partekatu
Tontxu Rodríguezek nazioarteko adopzio modernoa, arina, eraginkorra eta zabala bultzatzeko politikaren alde egiten du.
Justiziako bozeramaile sozialista eta Euskal Autonomia Erkidegoko senatari Tontxu Rodriguez gaur oso kritiko agertu da Alderdi Popularrak eginiko ekimen baten inguruan. Horren bidez, Gobernuari eskatzen diote nazioarteko adopzioen inguruan neurri jakin batzuk hartzea, eta gaur goizean onartu du Senatuko Osoko Bilkurak.
PSOEko senatariak nabarmendu du sozialistak “beti egon garela” eta “proposatu ditugula” estatuko adopzioaren eta nazioarteko adopzioaren prozesuak desblokeatzeko neurriak; izan ere, “uste dugu adopzioa modu integralean eta lehentasun gisa jorratu behar dela”. Hala, gogorarazi du duela aste bat bere talde legebiltzarkideak –alderdi gehienek bezalaxe, Alderdi Popularra barne- Diputatuen Kongresuan testu bat onartu zutela, eta “testu hori ona eta duina dela umeei laguntzeko zain denbora asko daramaten milaka familiarentzat, eta ona, era berean, familia bat osatu nahi duten milaka umeentzat”, horietako batzuk, gainera, 10 urte baino gehiago daramate zain.
Horren harira, Tontxu Rodriguezek esan du bitxia iruditzen zaiola gaur Alderdi Popularrak Ganbaran aurkeztu duen ekimena. “Itxurakeriatzat” jo du, ez duelako gai honek merezi duen irmotasunik eta seriotasunik erakusten. Horren froga da mozio horri –hiru puntu ditu testuak, eta gauza asko falta zaizkio- oposizioko taldeek “20 zuzenketa” aurkeztu dizkiotela; horietako bost, Alderdi Sozialistak. “Adopzioek funtzionamendu ona izatea nahi baduzue, akordio bat bilatu behar duzue gainerako indar politikoekin, bestela, berriz ere iruzurra egingo duzue Osoko Bilkura honetan, beste gezur bat elkarteei, familiei, umeei, eta batez ere beste gezur bat Kongresuko zuen kideei, berriz ere –eta barkatu esapideagatik, presidente jauna- ipurdia agerian utziko dizuete” zehaztu du.
Justiziako bozeramaile sozialistak adierazi du Nazioarteko adopzioari buruzko abenduaren 28ko 54/2007 Legeak aurrerapen handia ekarri zuela. Hala, gaineratu du Haurrak eta Nerabeak Babesteko sistema aldatzen duen uztailaren 28ko 26/2015 Legeak ere aurrerapen handia ekarri zuela. Alderdi horretan, oso kritiko agertu da Alderdi Popularrarekin “ezer egin ez duela” leporatuta. Halaber, esan du 26/2015 Legearen erregelamendua ez dela garatu Gobernuaren “eraginkortasun ezaren” eta “geldikeriaren” ondorioz; izan ere, denbora luzez argudiatu du erregelamendua “oso aurreratuta” zegoela, “ia eginda zegoela” eta “2016. urte amaierarako” prest egongo zela, edota blokeo instituzionalak eragozten ziela berau gauzatzea.
Horri dagokionez, kritikarekin jarraitu du esanez Eusko Jaurlaritza bi urte geldi eta “adingabeen eta familien alde ezertxo ere egin gabe” egon dela Rajoyren gobernuaren “bitartekotasuna” alegatuz. “Bi urte horietan, denbora izan zuten, egia da, aldi baterako gobernu hartan ereindako patataren gainean erregelamendua ezartzeko. Hori da garrantzitsuena haurrentzat, gazteentzat eta familientzat. Baina adopzioaren inguruan, ez zuten ezer egin” gaitzetsi du.
Espainia, 12-15 puntuko aldearekin AEBerekin, Holandarekin eta Frantziarekin alderatuta
Tontxu Rodriguezek adierazi du Espainia dela munduan familia esparruko legeria aurreratuena duen herrialdea, eta ziurtatu du adopzioak % 85 jaitsi badira ere, eta eskaerak % 72, gaur egun 12-15 puntuko aldea dugula Estatu Batuekin, Holandarekin eta Frantziarekin alderatuta. “Beherakada horren erantzukizunaren zati handi bat Alderdi Popularraren Gobernuarena dela” zehaztu du, bere utzikeriagatik.
Era berean, nabarmendu du Espainian 33.000 familia daudela adopzioaren zain, zentroetan 16.000 ume daudela familia baten zain, eta guraso berriekin bizimodu hobea espero duten 120 milioi umezurtz, munduan. Hala ere, zoritxarrez azken urteotan “ia ezinezkoa da gure herrian adoptatzea”.
Horrekin lotuta, senatari sozialistak azpimarratu du momentu ona dela familiei “erantzun bat” emateko, eta, horretarako, esan du izapidetze sistema hobetu behar dela, gardentasuna hobetu behar dela, funts publikoak horretara bideratu behar direla, kontzientziazio kanpainak egin behar direla, atzerako begirada historikoa egin behar dela, estatuaren eta autonomia-erkidegoen artean koordinatu beharra dagoela, Konstituzioaren 39. artikulua bete egin behar dela, Nazioarteko Adopziorako Erakunde Laguntzaileen (NAEL) entitate laguntzaileak babestu egin behar direla, eta, azken batean, “borondate politikoa” izan behar dugula. “Baina zuek mozio honekin ez duzue inolako borondate politikorik ekarri, eta zuentzat adopzioak ez du lehentasunik agenda politikoan” aurpegiratu du.
Ildo berean, Legebiltzarreko talde guztien artean “politika egokia ezarri behar dugu estatuko eta nazioarteko adopzio modernoa, arina, eraginkorra eta zabala bideratzeko” eta berriz ere leporatu dio Alderdi Popularrak ez duela adostasunik bilatu nahi eta haien kideek Diputatuen Kongresuan onartzen dutena ere ez dutela onartzen edo bere gain hartzen. “Uste genuen gaur serioz ari zirela, familia eta haurrak babesteko politika bultzatuko zutela, erregelamendua garatuko zutela, adopziorako bide berriak irekiko zituztela, izapideak erraztuko zituztela, baina denbora zoragarri hau galdu ondoren, berriz ere erakutsi dute familia baten zain dauden milaka eta milaka ume, eta seme-alaba baten zain dauden milaka familia alde batera utzi dituztela” kritikatu du.
Egoera hori ikusita, Tontxu Rodriguezek adierazi du Alderdi Sozialistak “ez duela iruzur honen alde egingo” eta popularren ekimen horretan abstenitu egingo dela. Alderdi Popularreko taldeari zuzenduta esan du “gaur herritarrek jakin behar dutela zuek berriz ere jokaldi makurra egingo duzuela” mozio “iruzur horrekin, eta adopzioari mesede gutxi egingo diozuela Espainian”. “Zuek dagoeneko ez duzue sinesgarritasunik, herritarrei gezurrak eta iruzurrak egiten dizkiezue, eta orain parlamentuan bertan ere egiten duzue” esan du amaitzeko.
