partekatu
• ZUZENKETAK
Euskadiko zaintza-sistemari buruzko ponentzia bat sortzearen gainean
OSOKO ZUZENKETA
- Eusko Legebiltzarrak Eusko Jaurlaritzari eta gainerako erakundeei eskatzen die kanpainak egin ditzatela zaintzek duten balio soziala aitortzeko. Berdintasunean oinarrituriko gizarte baterantz aurrera egiteko, ezinbestekoa da zaintza-lanak ikusgarri egitea, besteak beste, herritarren artean gizonei eta emakumeei esleitzen zaizkien zaintza, rol edo funtzioei buruz hausnartzeko.
- Eusko Legebiltzarrak Eusko Jaurlaritzari eskatzen dio bete dezala Euskal Autonomia Erkidegoko adinekoentzako egoitza-zentroei buruzko 126/2019 Dekretuari buruzko 27/2019 Mozioaren inguruan hartutako erabakia.
- Eusko Legebiltzarrak Eusko Jaurlaritzari eskatzen dio bete dezala Emakundek euskal emakume pentsiodunen egoera aztertu eta emakume horien bizi-baldintzak duintzeko ekintza-plan integral bat aurkezteari buruzko 99/2018 Legez besteko Proposamena dela eta hartutako erabakia.
- Eusko Legebiltzarrak Eusko Jaurlaritzari eskatzen dio prestatu dezala, ahalik eta lasterren, zaintzaile ez-profesionalen estrategia, zeinak jasoko baitu bai oraingo egoeraren azterketa bai aurrerantzean ezarri behar diren neurriak, jardute-kronograma batekin eta aurreikusitako aurrekontu-kontsignazioarekin. Estrategia horrek paradigma berri bat bultzatuko du, zeinaren bidez erantzun ahal izango baitzaio laguntzarekin eta haien bizi-proiektua arriskuan jarri gabe zaintzeko prest dauden gizon-emakume zaintzaileen belaunaldi berri bati, horretara bideratzen den laguntza formala eta zaintzaileei atseden eta laguntza emateko zerbitzuak indartuz, eta gizonak zaintza inplika daitezen sustatuz. strategiak printzipio hauek bete beharko ditu:
- Integrala eta dimentsioaniztuna izatea eta erakundearteko eta sailarteko ikuspegia izatea.
- Ikuspegi berritzailea txertatzea.
- Zaintzailea bera eskubidedun subjektu gisa sartzea.
- Zaintza demokratizatzera zuzendua izatea.
- Berdintasun ezak zuzentzeko balio duen genero-ikuspegia izatea.
- Prebentziora bideratua izatea.
- Komunitatearen ikuspegitik egina izatea.
