PSE-EE PSOE Socialistas Vascos

Urteak daramatza Venezuelak egoera dramatikoa bizitzen, benetako larrialdi sozial eta ekonomikoa, AEEk eta NBEk salatutako Giza Eskubideen urraketa larriek larriagotua. Egoera horren ondorioz, milioika pertsonak Venezuelatik erbesteratu eta beste herrialde batzuetan babesa bilatu behar izan dute.

Venezuela huts egindako estatua da gaur egun, eta ez da gai bere biztanleei ahalik eta ongizate-baldintza txikienak bermatzeko. Herrialde horretan miseria gero eta handiagoa eta jasanezinagoa da, eta klase ahulenak dira kaltetuenak.

Estatuak urteak daramatza estatistika ofizialak argitaratzeari uzten, eta ezagutzen ditugun datu guztiak nazioarteko erakundeen estimazioak dira, adierazle propioetan oinarrituta. Baina argi dagoena da duela urte batzuetatik hiperinflazio neurrigabea dagoela, sendagaien, premia biziko produktu higienikoen eta oinarrizko elikagaien hornikuntza falta dramatikoa, herritarrak egoera tragikoan jartzen dituena. Venezuelan ez dago urik, ez dago elikagairik, ez dago elektrizitaterik eta indarkeria soberan dago nonahi.

Venezuelako biztanleek ahal duten moduan jasaten dute delinkuentzia izugarri bat, munduko kriminalitate-indize handienetako bat. Hori guztia larriagotu egin da Nicolas Maduroren Gobernuak zuzendutako Segurtasun Indarrek Giza Eskubideak sistematikoki urratu dituztelako. 2014tik 2020ra bitartean 18.093 hilketa baino gehiago egin dituzte Estatuko segurtasun indarrek eta talde paramilitarrek, exekuzio estrajudizialak eta manifestarien hilketak barne, AEEren Idazkaritza Nagusiaren arabera. Halaber, txostenaren arabera, 15.501 atxiloketa arbitrario eta 724 desagertze behartu izan dira 2018an eta 2019an.

Testuinguru beldurgarri horretan, Nicolas Maduroren erregimenak Asanblea Nazionalerako hauteskundeak deitu zituen abenduaren 6an. Batasun Demokratikoaren Mahaia osatzen duten oposizioko alderdiek aho batez erabaki zuten Parlamentuko hauteskundeetan ez parte hartzea, plangintzan izandako irregulartasunengatik eta zazpi alderdi politikok judizialki egindako salaketagatik.

Horregatik guztiagatik, Legez Besteko Proposamen hau aurkeztu da Osoko Bilkuran eztabaidatzeko:

Eusko Legebiltzarrak:

• Alderdi politikoek askatasunez parte hartzeko inolako bermerik gabe antolatutako hauteskunde hauek errefusatzen ditu.
• Ez du legez kontrako hauteskunde horien emaitza onartzen, baldintza eta berme demokratikoak betetzen ez dituelako, eta, gainera, nazioarteko behaketarik gabe egiten delako.
• Beste behin salatu du Nicolas Maduroren erregimenaren diktadura-deriba.
• Indar politiko eta sozial guztiei dei egiten die bat egitera, Venezuelako biztanleei gizartearen eta ekonomiaren ongizatean oinarritutako bizi-baldintza duinak bermatzeko beharrezkoa den aldaketa politikoa bermatzeko.
• Erakunde guztien babesa eskatzen du, Venezuelari trantsizio baketsua ziurtatzeko, justiziara, askatasunera eta demokraziara itzultzea bermatu ahal izateko.