partekatu
Pau Blasi: “EAJk eta EH Bilduk igo egin nahi dute euskararen eskakizun-maila euskal Administrazioan, nahitaezko betekizun modura orokortzea ez denean”
PSE-EEren bozeramailearentzat, “errorea” da oposizioetan nahitaez bete beharreko indize batzuk kentzea, “hamarkadetan eraiki izan diren kontsentsuak apurtzen dituelako”
EAJ alderdiari aurpegiratu dio “EH Bilduri zeharretara begira” aritzea, euskal gizartearen hizkuntza-errealitateari kasurik egin gabe Enpleguaren Legeari buruzko proposamenean
PSE-EEren euskara arloko bozeramaileak, Pau Blasik, Eusko Legebiltzarrean azaldu du EAJk zein EH Bilduk Enplegu Publikoaren Legea aldatzeko aurkeztu dituzten proposamenak hizkuntza aukeratzeko askatasunaren eta hizkuntza arloan Euskadin kontsentsu zabalak ehundu izan dituzten beste printzipio orokor batzuen kontra doazela, eta botere publikoen betebeharra dela eskubide hori bermatzea. Sozialisten iritziz, EAJk eta EH Bilduk igo egin nahi dute euskarari buruzko eskakizun-maila euskal Administrazioan, derrigorrezko betekizuna orokortzea ez denean. Bi alderdi horiek elkarri eman dioten babesei esker izapidetzen hasteko oniritzia lortu izan du legearen proposamenek jasotzen dituzten aldaketekin.
“Eztabaidatu beharko den ekimena arau guzti horien eta akordio guztien horien kontra doa. Nahitaez bete beharreko indizeak kentzea proposatzen du, urtetan indarrean egon eta gero, noiz eta urtebete besterik ez denean esan zutela baliagarriak izaten jarraitzen dutela. Proposamen horrek ez du bermatzen inongo segurtasun juridikorik, haiek dioten bezala. Guztiz kontrakoa. Ezegonkortasun eta zalantza gehiago dakartza”, adierazi du. Eta esan du lege-proposamena “proportzionaltasun- eta malgutasun-irizpide ororen, herrialdea bere aniztasun eta konplexutasunean ulertzearen gainetik” ari dela jartzen.
Legebiltzarkide sozialista eta PSE-EEko Euskara idazkari denak gogoratu du iragan legegintzaldian eguneratu izan zirela bai Enplegu Publikoaren Legea, bai Administrazioan Euskararen Normalizaziorako Dekretua. “Kontsentsu zabalen bidez atera genituen aurrera erreforma guzti horiek, esparru juridikora moldatuz eta erakundeei lasaitasuna emanez. Eta, herrialde honetan hizkuntzaren kontuan berrogei urtez egon izan diren printzipio orokorrak kontuan hartuta: hizkuntza aukeratzeko askatasuna, botere publikoek eskubide hori bermatzeko duten betebeharra, hori gure gizartearen errealitate soziolinguistikora egokituta”.
Alderdi Sozialistarentzat, “narrasa” da EAJren proposamena, eta “errorea”. Interes alderdikoi bati erantzuten dio, “arerio politikoari zeharka begira dabilelako”, EH Bilduri aipu eginez. Pau Blasik hori onartzen bada sortuko diren ondorioez ohartarazi du: “Haren proposamenak ez du inongo arazorik konpontzen. Ez dio inolako berme juridikorik ematen oposizioei. Aitzitik, helegite gehiago jarri ahal izango zaizkio”, adierazi du. Eta euskararen arloan porrot egin zuten beste erreforma batzuk ekarri ditu gogora, Udal Legean sartu izan zena, kasurako, PSE-EEren babesik gabe onartu izan zena eta gero helegitea jarri eta hein batean baliogabetua izan zena.
Ordezkari sozialistarentzat, euskararen sustapenak “beste bide batzuk” behar ditu. “Birpentsa daitezke euskarari buruzko politikak. Espazio berri batzuk zabal daitezke. Abiapuntua, ordea, inklusioa eta herritarren eskubideekiko errespetua izan behar du”, esan du.
Horren haritik, ondo ikusten ditu EH Bilduk euskara ikasteko proposatutako liberazioa, baliabide ekonomikoak handitzeko edo prestakuntza-plan pertsonalizatuak jartzea bezalako planteamenduak. Baina kritikatu egin du koalizio subiranistak derrigorrez bete beharreko indizeen proposamena jartzea erdigunean eta euskara Euskadiko lanpostu publiko guztietara nahitaezko betekizuna izatea orokortu nahi izatea.
