partekatu
Eneko Andueza: “Euskal gizartearen gehiengoak eta terrorismoaren biktimek eskatzen zuten zuzenketa izan da odoleko delituak dituzten EH Bilduko hautagaiek uko egitea”
Eneko Andueza PSE-EEko idazkari nagusiaren adierazpena EH Bilduren zerrendei buruz:
Berri ona da odoleko delituak dituzten EH Bilduko hautagaiek uko egin izana. Zuzenketa hori zen euskal gizartearen gehiengoak eta, bereziki, terrorismoaren biktimek eskatzen zutena.
Errespetuan eta pluraltasunean oinarrituta egongo den bizikidetzaren bilaketak legaltasuna betetzea baino zerbait gehiago eskatzen du, legea betetzea ezinbesteko baldintza bat den arren.
Hemendik aurrera, espero dugu ezker abertzaleak burutuko duela bere ibilbide etikoa, bidegabeki eragindako kaltea aitortuz.
Aurkaria erasotzeko eta hauteskunde-irabaziak lortzeko terrorismoaren erabilpenak zein biktimen instrumentalizazioak hondatu egiten du eztabaida politikoa, ez-morala izateaz gain.
Orain, etorkizunera begiratzen jarraitu eta memorian eta indarkeriaren biktima guztiekiko errespetuan oinarritutako bizikidetza sendo baten indartzean laguntzea dagokigu, bakearen eta askatasunaren kultura sustatuko duen gizarte batean.
