partekatu
Idoia Mendiak premiazko neurriak eskatu dizkio Europako Batzordeari Tubos Reunidosen euskal lantokietako enplegua babesteko
Idoia Mendia Europako Parlamentuko eurodiputatu eta Enplegu Batzordeko kide denak premiazko neurriak har ditzala galdegin dio Europako Batzordeari Tubos Reunidos bezalako enpresa estrategikoak hirugarren herrialdeen muga-zergen presiotik babesteko. Eskaera altzairuzko hodien euskal fabrikatzaileak enplegu-erregulazioko espedientea –300 familiari eragiten die Euskadin– iragarri ondoren egin du. Halaber, Altzairu eta Metalen Ekintza Planak europar altzairutegien bideragarritasuna bermatu behar duela eskatu du, eta enplegua zaindu behar duela merkatu globalen ezegonkortasunaren aurrean nahiz kanpoko merkatuak galtzearen ondorioz.
Erkidegoko Exekutiboari igorri dion idazki batean, hauxe dio: “altzairuaren industria funtsezko zutabe bat da Europar Batasunaren autonomia estrategikoan, eta kalitateko enpleguen motor bat da Euskal Herria bezalako eskualde industrialetan. Alabaina, gero eta presio gehiago jasaten ari da lehia global asimetrikoaren eta hirugarren herrialdetan muga-zergak gogortzearen ondorioz”.
Idoiaren iritziz, Tubos Reunidosen erabakiak agerian uzten du egungo testuinguru globalak industriako enpleguan duen inpaktua. Iragarri den EEEa salbuespenak galdu izanari eta AEBetako merkatu estrategikoan muga-zergen inpaktuarengatik sortu da, ezegonkortasun geopolitiko eta ekonomikoaren ziurgabetasunak larriagotua.
Mendiaren iritziz, “EBk benetako subiranotasun industrial bat izan nahi badu, saihestu egin behar du merkataritza-defentsarik ezak murrizketak eta itxierak eragin ditzan langileen ongizaterako giltzarri diren lehiakortasun-zentroetan”. “Lehentasuna EBren kalitateko enplegua eta ekoizpenerako gaitasuna babestea izan behar du”, azpimarratu du.
