partekatu
PSE-EEk Mikel Mancisidorren hautagaitza erregistratu du Ararteko kargurako EAJrekin batera
Bi alderdiek gaur goizean aurkeztu dute Eusko Legebiltzarrean Arartekoa izateko proposamen bateratua
Mikel Mancisidor Ararteko izateko hautagaitza erregistratu dute gaur goizean Eusko Legebiltzarrean EAJ-PNV eta PSE-EE legebiltzar taldeek. Proposamena Joseba Diez Antxustegi EAJren bozeramaileak eta Ekain Rico Sozialisten Taldearen bozeramaileak aurkeztu dute batera.
Mikel Mancisidor bilbotar legelaria Zuzenbidean lizentziatua da Deustuko Unibertsitatetik eta Nazioarteko Harremanetan doktorea Genevako Diplomazia Eskolatik. Euskal Herriko UNESCO Etxearen zuzendari izan zen 10 urtez (2004-2014). Bere ibilbide profesionala giza eskubideak eta gobernantza demokratikoa defendatzera zuzendu izan du, eta ibilbide arrakastatsua burutua du nazioartean.
Proposamen horrekin, EAJk zein PSE-EEk Arartekoari buruzko adostasuna eta horren independentzia indartzeko borondatea azpimarratzen dute, funtsezko eragilea baita euskal herritarren eskubide eta askatasunak aldezteko.
