partekatu
Eneko Andueza: “Premiazko Neurrien Legea belaunaldi oso batekin hartzen den konpromiso bat da; pertsona guztiei etxebizitzarako eskubidea bermatzeko aldaketak dakartza”
PSE-EEko idazkari nagusiak dio araua “gauzak aldatu egin behar direla” sinestetik sortu dela, “espekulaziotik irabazia ateratzen jarraitzeko” denak berdin jarraitzea nahi dutenen aldean.
PSE-EEko idazkari nagusi eta Legebiltzarreko bozeramaile denak, Eneko Anduezak, Etxebizitza, Lurzoru eta Hirigintzako Premiazko Neurrien Legearen balioa azpimarratu du gaur Euskadik bizitegien arloan duen larrialdiari erantzuna emateari eta euskal herritarrei etxebizitzarako sarbidea bermatzen laguntzeari begira. “Hau ez da edozein lege. Belaunaldi oso batekin hartzen dugun konpromiso bat da, bi konbikziotan oinarritzen den arau bat da: lehena, etxebizitza konponbidea daukan arazo bat dela; eta, bigarrena, gauzak aldatu egin behar direla”.
Legea aintzat hartzeko Eusko Legebiltzarrean egin izan den eztabaidan, Anduezak esan du Denis Itxaso sailburuak zuzentzen duen Etxebizitza eta Hiri Agenda sailetik bultzatzen den arauak aldatu egiten duela egoera etxebizitzaren arloan, “uko egiten diogulako kontrakoa esaten dutenei, espekulaziotik irabazia ateratzen jarraitzeko aldaketarik ez dela egin behar diotenean. Badaude konponbideak, eta beharrezko aldaketak aplikatzeko ausardia izan behar da”. “Sozialistak aldaketa horiek egitera etorri gara, pertsona guztien eskubideak bermatzeko eta Euskadi hobeago bat eraikitzeko”, gaineratu du.
Etxebizitza Legeak duela gutxi bete izan duen hamargarren urteurrena ekarri du gogora buruzagi sozialistak. “Aurrerapen oso garrantzitsuak ekarri zituen, adibidez, babes publikoko etxebizitzen kalifikazio iraunkorrari lege izaera emanez sendotzea, gure baliabide publikoak alokairura zuzentzeko erabakia, edo etxebizitzarako sarbidea eskubide subjektibo bat dela aitortzea”. “Egun, Euskadik bakarrik bermatzen ditu politika horiek, kudeaketa aurrerakoiaren eredutzat hartua da egun, eta arloan erkidego aitzindaria izateak bereizten gaitu”, gaineratu du.
1991tik Euskadik 108.000 etxebizitza babestu eraiki izan dituela, 20.910 etxek eskubide subjektiboa aitortua izatea, 25.000 familiak alokairuko etxebizitza babestu batez gozatzen dutela edo 33.000 pertsonek etxebizitzaren prestazio osagarri bat jasotzen dutela bezalako aurrerapenak aurrerapen, Eneko Anduezarentzat “ukaezina” da etxebizitza dela gaur egun Euskadin “lehen magnitudeko arazo bat euskal gizarteko geruza zabal batzuentzat, ez bakarrik kalteberenentzat, baita klase ertaineko zati garrantzitsu batentzat ere”.
Premiazko Neurrien Legearen proposamena “egoera horri buelta ematera” dator, bozeramaile sozialistaren hitzetan, “hirigintzako prozedurak azkarragoak izan daitezen oztopoak kentzeko, udalei etxebizitza babestuko sustapenak martxan jartzea erraztuko dieten tresnak emateko eta Eusko Jaurlaritzari plangintza eta kudeaketa hobetzeko tresnak eskaintzeko” neurriekin.
Bukatzeko, legearen funtsezko alderdi batzuk aipatu ditu, “etxebizitzaren eskaintza desblokeatzeko eta eskatzaileak babesteko” aukera emango duelako hirigintzako izapideak azkartzeko mekanismoekin, lurzoruaren erreserba estrategikoekin, etxebizitza babestuen sustapenei heltzeko malgutasunarekin, zuzkidura-bizitegiekin edo kontratazioaren hobekuntzarekin.
