partekatu
Eneko Andueza: “Euskadi lideratzeko anbizioa dugu, gobernuetan lanean jarraituz gero lortuko dugun helburu bat da”
PSE-EEko idazkari nagusiak Euskadi Irratian kritikatu egin du EH Bilduk Aurrekontuak babesteko eman duen ezetza: “ELAren presoak dira erabat”
PSE-EEko idazkari nagusiak, Eneko Anduezak, bere alderdiak Euskadi lideratzeko duen “anbizioa” azaldu du, hori izango baita datorren 10. Kongresuaren ardatzetako bat, sozialistek azken urteotan izandako ibilbidean oinarrituta. “Euskadi lideratzea da gure anbizioa eta gure helburua. Badakigu ez dela epe laburrean gauzatuko den bide bat, baina geure bide-orria jarraitzen badugu, lanean eta politikan eraginez jarraitzen badugu, gobernuetan eraldatzeko gaitasun handiagorekin, lortuko dugun helburu bat izango da”, adierazi du.
Buruzagi sozialistak konfiantza azaldu du PSE-EEren proiektuan, eta azken hauteskundeetako emaitzak azpimarratu ditu. “Hiru urtetan, euskal gizarteak bost aldiz eman digu arrazoia, egin izan diren bost hauteskundeetan. Guztietan igo egin dugu gure ordezkaritza, eta horietakoren batean ere lehen indarra izatera heldu gara, botoetan irabazi egin dugu Euskadin azken hauteskunde orokorretan”, gogoratu du.
Hiru urtetan, euskal gizarteak bost aldiz eman digu arrazoia, hauteskundeetan guri babesa handituz.
Euskadi lideratzeko anbizioa dugu. Eragiteko gaitasun handiago izanez eta gobernuetan indar gehiago edukiz jarraitzen badugu, lortuko dugun helburu bat… pic.twitter.com/8nFUZAkD0z
— Eneko Andueza (@enekoandueza) December 12, 2024
Euskadi Irratian egin dioten elkarrizketa batean, Anduezak kritikatu egin du EH Bilduk Eusko Jaurlaritzak euskal Aurrekontuen inguruan adostasun batera iristeko egindako proposamenari eman dion ezetza, eta esan du Arnaldo Otegiren alderdia “ELAren presoa” dela erabat, eta Lanbidearteko Gutxieneko Soldataren inguruan negoziatzeko aurkeztu izan dituen proposamenak “irrealak” direla. “Ez dute sekula onartuko hori Elkarrizketa Sozialerako Mahaian negoziatuko denik”, azaldu du. “Hasieran esan ziguten 180 graduko biraketa nahi zutela Aurrekontuan, eta bi kontu besterik ez zituzten azkenean aurkeztu. Haien zuzenketak ikusita, argi eta garbi ikusten da zer den Aurrekontu on bat, eta haien negoziatzeko borondatea nola zen postureo bat”, adierazi du.
EAJ zein EH Bildu “euren kontuetan sartu-sartu eginda” ikusten direla esan du PSE-EEko idazkari nagusiak, jarrera subiranistetatik gero eta urrunago den euskal gizarte baten errealitatetik kanpo. Jarrera horren aurrean, Anduezak esan du sozialistak “jendearen eguneroko arazoak konpontzera” zuzentzen direla.
Gernikako Estatutuaren erreformaren inguruan, berriz, Andueza hori berritzearen alde azaldu da azken 45 urteetan konkistatuko eskubide sozialak blindatzeko. “Bizikidetzaren arloan aurrera egiteko balio behar du, aniztasuna eta pluraltasuna indartuz”, azpimarratu du.
