partekatu
Eneko Andueza: “Premiazkoa da diplomaziarako, lankidetzarako eta elkarrizketarako dei bat bakea gerrari nagusitzea lortzeko”
PSE-EEko idazkari nagusiak Gernikako bonbardaketaren 88. urteurreneko ekitaldietan eta Nazio Batuen “Bakearen, gerren amaieraren eta nazioarteko legezkotasunaren errespetuaren aldeko oihua” ekimenean hartu du parte
PSE-EEko idazkari nagusiak, Eneko Anduezak, esan du premiazkoa dela elkarrizketarako dei egitea gerrarik gabeko mundu bat lortzeko. Gernikan esan du hori, foru-hiria hegazkin naziek eta italiarrek bonbardatu zuten 88. urteurrena gogoratzeko eta Nazio Batuek antolatutako “Bakearen, gerren amaieraren eta nazioarteko legezkotasunaren errespetuaren aldeko oihua” ekimenean parte hartzean. “Munduko egungo testuinguruan, premiazkoa da diplomaziarako, lankidetzarako eta elkarrizketarako dei bat bakea gerrari nagusitzea lortzeko”, adierazi du bere sare sozialetan.
Anduezak, halaber, familia sozialista eta Ramon Rubial Fundazioa ordezkatu ditu Zalloko hilerrian urtero bezala biktimen oroimenez egiten den lore-eskaintzan. Ekitaldi horretan parte hartu aurretik, PSE-EEko liderrak gogoratu du Espainiako II. Errepublikaren legezkotasunaren kontra altxatu ziren tropei laguntzeko Gernikako bonbardaketa “zibilen kontra airetik nahita egindako lehen erasoetakoa” izan zela: “herrian trauma sakon bat utzi zuen eta gerren giza kostuez mundu mailako kontzientzia iratzarri zuen tragedia bat”.
Eta esan du Gernikaren sinbolismoak bultzatu duela Nazio Batuen Zibilizazioen Aliantza herri hori hautatzera bere ekimenerako. Ekimen hori Miguel Angel Moratinosek zuzentzen du, United Nations Aliance of Civilizations (UNAOC) erakundearen idazkari nagusi ondoko eta goi-ordezkari denak.
Eta 2025eko apirilaren 26 horretan, Ukraina, Ekialde Ertaina edo Afrika adibiderik garbien dituen krisi global bati erantzunez, zabaldutako asmoaren helburu behinenak gogoratu ditu, hots: “gerraren kontrako gaitzespena areagotzea, bakearen mezua sustatzea eta nazioarteko zuzenbidearekiko errespetua defendatzea”.
