partekatu
• Elkarrizketa Sozialaren Mahaia
Eneko Andueza: “Elkarrizketa sozialak politika publikoak eta Euskadi indartzen ditu etorkizuneko erronken aurrean”
“Elkarrizketa soziala funtsezko tresna bat da politika publikoak indartzeko eta Euskadi etorkizunari begira prestatzeko, askotariko erronkak izango baititu, batik bat ekonomiaren eta enpleguaren arloan”. Horixe izan da PSE-EEren ordezkaritza batek Euskadiko CCOOren zuzendaritzarekin izan duen bileraren konklusioetako bat. Sozialisten ordezkaritza Socialistas Vascos-Eusko Sozialistak legebiltzar taldeko bozeramaileak, Eneko Anduezak, eta hango idazkari nagusi eta Enpleguko bozeramaileak, Ekain Ricok, osatu dute. Euskadiko CCOOren ordezkaritzaren buruan, berriz, Loli García idazkari nagusia izan da.
Arduradun sozialistek Eusko Jaurlaritzaren, Confebask-en eta sindikatuen artean Idoia Mendia lehendakariordea buru deneko Elkarrizketa Sozialaren Mahaian berriki lortutako akordioen balorazioa egin dute. Akordio horien artean daude ABEEn osagarriak luzatzea bezalako neurriak, baina baita ikuspegia euskal gizartea jada murgildurik den eraldakuntza handietan finkaturik duten beste batzuk ere, industriaren digitalizazioarekin, enplegu berrietarako prestakuntzarekin edo genero-berdintasunarekin lotutakoak.
Elkarrizketan hizpide izan dute, halaber, Tubacex gisako enpresa enblematiko batean lortutako ituna. PSE-EErentzat, akordio hori da konfrontazioaren ordez elkarrizketa sozialean oinarritutako harremanen eredu bat posible denaren froga, langileek uko egin gabe lan-baldintza hobeagoak aldarrikatzeari eta enpresen kudeatzaile eta jabeek euren interesen defentsan arituta.